Barrydale

Stundum er mjög erfitt að blogga hérna. Var búinn að skrifa langan pistil í gær og var að fara að setja hann á netið þegar rafmagnið fór eitt andartak og allt fór út. Svona getur nú lífið í Greyton verið stundum. Nú skrifa ég pistilinn fyrst í word og skeyti honum svo inn á bloggið.

Líðanin er farin að vera betri og kæra Hrund, baráttuandinn er að koma aftur. Held bara að þreytan hafi verið farin að segja til sín all verulega og er að brjótast út núna.

Við fórum til Barrydale með Rögnu á þriðjudag eftirmiðdag. Það var yndilegt að komast aðeins út úr þessu hóteli og að hitta vini okkar í Barrydale. Skapköstin mín komu smá út en annars var þetta bara “geðbilað” frí. Í fyrsta skipti hafði maður almennilega matarlist og át og át. Steikurnar eru reyndar þær allra bestu þarna og ssvo tapas réttirnir hennar Terry æðislegir. Hún rekur þarna lítinn matsölustað og sérhæfir sig í spænskum mat. Við náðum að semja við hana um að koma í byrjun apríl hingað til Greyton og að vera með spænska daga hjá okkur. Í leiðinni ætlar hún svo að þjálfa kokkana okkar. Hlökkum mikið til. Jóhanna er byrjuð að æfa flammengo dansa og eitthvað var Frú Gleði að tala um að dansa með henni. Á nú samt ekki von á því að hún geri það.

Við komum svo tilbaka hingað fimmtudaginn seinnipartinn. Við Ragna fengum okkur nokkrar vodka blöndur á leiðinni og skemmtum okkur konunglega. Langt síðan að ég hef fíflast svona eins og við gerðum. Finnst ég endurnærður.

Það gekk allt mjög vel hjá Jóhönnu og Gússý. Jæja, Frú Gulltönn notaði reyndar tækifærið þegar Jóhanna fór heim aðeins að skipta um föt og sagðist vera lasin og að hún væri búin að tala við Jóhönnu og fór heim. Hún hafði nátturlega ekkert talað við Jóhönnu um þetta og var bara að skrópa. Þurfum að taka hana á alvarlegt samtal þegar hún kemur aftur í vinnu. Við Bói vorum mjög stoltir af Jóhönnu og Gússý og hvað allt hafði gengið vel hjá þeim.

Ragna er búin að vera á fullu að taka viðtöl við starfsfólkið og það gengur bara mjög vel. Ekkert samt að koma fram sem kemur okkur á óvart og fólk er almennt ánægt í vinnunni. Það verður samt spennandi að fara yfir öll viðtölin og ákveða hvernig við tökum á framhaldinu.

Það voru teknar nokkrar ákvarðanir í Barrydale. Og lykil orðið er “delegation” eða hvað það er nú á íslensku? Sem sagt að afhenda verkefni til annarra svo þau séu ekki að drepa okkur. Hef ekkert á móti því að elda annað slagið þegar einhver kokkurinn er lasinn eða eitthvað svoleiðið, hef heldur ekkert á móti því að strauja ef það vantar einhvern í þvottahúsið, eða að sjá um bókhaldið. En það er bara ekki það sem ég er bestur í og því er best að fá rétta fókið til að gera þessa hluti svo maður geti farið að einbeita sér að því sem maður er bestur í. Sem sagt markaðsetning. Hef ekki sinnt henni sem skyldi sökum annarra verkefna sem bara hlaðast á mann.

Fékk konu í viðtal á föstudaginnn sem ætlar að taka að sér að gera upp bókhaldið fyrir fyrstu þrjá mánuðina, gera upp VSK og launagjöld sem hafa gersamlega setið á hakanum og hafa valdið mér þungum áhyggjum. Því miður kann hún ekkert á tölvur og því get ég ekki ráðið hana í vinnu nema bara til að gera upp þessa fyrstu þrjá mánuði. Svo kemur önnur kona í viðtal á miðvikudaginn og vonandi getur hún svo komið einu sinni eða tvisvar í viku og fært bókhaldið inn í tölvu frá og með janúar. Þá verður nú einn hausverkurinn búinn. Vonandi gengur þetta nú allt eftir sem skyldi.

Það er búin að vera ótrúleg frjósemi hérna eftir að við tókum við: Love is in the air, getur það verið? Karen (aðstoðarkokkur) er komin einhverja fimm mánuði á leið og svo er Frú Gulltönn komin einn eða tvo mánuði á leið líka. René hélt að hún væri annað hvort ólétt eða með krabbamein. Hefur fengið krabbamein og það náðist að fjarlægja það fyrir einhverjum tíma síðan og svo er hún að rembast við að verða ólétt. Er búin að hafa einhverja kviðarverki og ógleði, en þorði ekki til Læknis. Jóhanna (Florance Nightingale) fór með henni til læknisis og sem betur fer er hún ekki ólett og ekki heldur með krabbamein. Þetta var bara einhver vírus sem hún fékk lyf við. Núna finnst henni svo ofboðslega vænt um Jóhönnu, eins og reyndar allt starfsfólkið okkar. Karen og Frú Gulltönn eru farnar að deila um það hvor þeirri getir skírt barnið sitt Jóhanna Maggý í höfuðið á henni. Og ef það verður drengur þá verður það Jóhann Magnús. Þetta segir nú svolítið mikið um það hvað þeim finnst vænt um hana. Við elskum hana líka og dáum.

Ég var í fríi í gær heima. Einn. Drakk hvítvín og glápti á sjónvarp. Ohh það var geðbilað gott og manni fannst maður næstum því eiga normal líf. Það var meira að segja gleði í mér og ég hló einn yfir “Weakest link” (sem var eitt af uppáhalds þáttunum mínum heima). Ann Robertson er nú algert bitch, en fyndin er hún!

Það var hellirigning í gær og við vorum að spá í að aflýsa tónleikunum. Bói ákvað svo að við skyldum bara halda tónleikan og fólk gæti setið í skjóli upp við húsið eða inni. Það komu um 30 manns sem er ótrúlega gott miðað við veðrið. Hér fer fólk varla út úr húsi ef það rignir.

Ég kom svo þegar tónleikarnir voru búnir. Þá var Neil og Marise hérna. Tók Marise á eintal og sagði henni hvað ég væri þakklátur fyrir allan stuðningin og hjálpina. Væri samt ótrúlega þreyttur og nú vildi ég taka frí frá öllum endurbótum, viðgerðum og fúski í einhvern tíma. Bói er búinn að vera brjálaður úti hana vegna þess hvað mikið fúsk hefur verið gert og kennir henni um. Er að hluta til sammála honum en ekki að öllu leiti. En ég náði að segja að nú væri komið nóg í bili og við skyldum taka okkur hvíld frá þessu. Hún samþykkti það. Svo komum við til með að láta Ami gera þetta allt sjálfan. Hann er miklu betri en allir þessir fúskarar sem hafa verið að vinna hérna. En ég sagði henni nátturlega ekki frá því. Finnst nefnilega vænt um hana og vil frekar eiga vináttuna hennar, heldur en að lenda í leiðinda málum útaf einhverju viðgerðum.

Þegar við komum svo heim fór Bói snemma að sofa, Jóhanna og Gússý fóru inn í herbergi sitt að horfa á “Sex in the city” sem er nú reyndar líka einn af uppáhalds sjónvarps þáttunum mínu. Fæ að horfa seinna á það hjá þeim. Við Ragna voru svo að kjafta saman langt fram yfir miðnætti.

Vöknuðum snemma og drifum okkur á markaðinn. Mjög áríðandi að sýna sig þar og versla soldið. Höfum tekið eftir því að fólkið sem við verslum við það kemur og snæðir hjá okkur. Virðist vera einhver taktík í því. Vöruskipti?, hvað veit ég, en við höfum alla vega tekið eftir því. Ég ætla að vera í fríi líka í dag, alla vegna hluta úr degi og bara eiga normal líf. Sakna þess reyndar að við getum ekki gert það saman, en svona er þetta hérna bara og verður víst í einhvern tíma áfram. Annar okkar þarf helst að vera á staðnum.