Sorry hvað ég hef bloggað lítið

Ég hef því miður bara verið svo ótrúlega upptekinn og þreyttur, enda ekki auðvelt að reka hótel einn og óstuddur. Guðmundur er reyndar kominn aftur fyrir viku síðan og hefur það bara gott. Þeir náðu að stilla lyfin hans heima og setja hann í smá endurhæfingu sem hefur skilað góðum árangri. Hann er mun betri núna, þó svo að hann þurfi að sjálfsögðu að passa sig. Svo er Lovísa hérna hjá mér og það er mikill stuðningur í því.

Það er bara þegar maður verður svona ofboðslega langþreyttur að maður hefur varla úthald í neitt. Hef fengið einn hvíldardag síðan Guðmundur kom og ég notaði hann til að sofa. Ég svaf og svaf og svaf, en fannst það engan vegin nóg. Svona er nú lífið hérna. Hugsanlegir kaupendur eru enn að spá og við erum farnir að vona að það gangi eftir að við getum bara labbað hérna út með hendur fullar af fé og farið á ströndina og legið þar í hálf ár og hugsað hvað maður gerir í framtíðinni. Sjáum til hvernig það fer allt saman. Erum nú samt ekkert of uppteknir af þessu.

Erum meira fókuseraðir á reksturinn og erum stanslaust að gera upp og breyta. Þetta er stórt hótel og í mörg horn að líta og að gera upp tekur mikinn tíma sem er oft bara ekki til. Svo er maður fullbókaður allt í einu og ekkert hægt að gera nema að hlaupa og tryggja að allt gangi vel. Erum fullbókaðir núna með ráðstefnu sem er alltaf gott. Sérlega skemmtilegt fólk sem var með þema kvöld í gær. Þau skiptu hópnum í 4 og það var einn hópur frá Hawai og drakk bara kokteila, annar hópur frá Mexikó sem drakk bara Tequila, Annar frá Rússlandi sem drakkk bara Vodka og fjórði hópurinn var frá Indlandi og drakk bara Cane. Þau voru öll klædd samkvæmt löndunum sem þau komu frá og skemmtu sér vel og enduðu í karioki á barnum. Varð seint kvöld með mikill drykkju hjá þeim.

Það er alltaf mikið álag þegar ráðstefnur eru til að tryggja að allt gangi vel. Aldrei hugsaði maður um það áður hvað væri í gangi á bak við þegar maður var sjálfur á ráðstefnu, bara ætlaðist til þess að allt virkaði. Hér er maður að færa til húsgögn, færa sjónvarp, fá DVD spilara, karioki, leigja glös og borðbúnað, kaupa sérstakan mat fyrir Halaal, Kosha og ég veit ekki hvað. Það er ótrlúlega mikil vinna sem fer í þetta og ITC þjálfunin hefur svo sannarlega hjálpað manni að vinna skipulega og að hugsa fyrir utan "boxið".

Hér er líka búið að vera smá uppgjör. Einn þjónninn kom til mín um daginn og fullyrti að hún hefði séð Gulltönn stela. Nokkrir aðrir starfsmenn voru með sögur sem studdu þetta og voru tilbúnir til að segja það fyrir framan hana. Við alla vegan tókum Gulltönn í viðtal og sögðum henni að þetta væri orðið gott. Alla vegan 4 starfsmenn hefðu séð til hennar gera hluti sem hún mætti ekki og við myndum ekki líða það. Henni voru boðnir 2 kostir, annað hvort segði hún upp eða hún yrði rekin. Við mæltum með fyrri kostinum sem hún þáði á endanum og svo var henni keyrt heim. Þannig að núna eru engir hérna lengur í stjórnunarstöðum. Þar fór áætlunin okkar um að afhenda völd og ábyrgðir. Þetta land er soldið klikk að þessu leitinu. Við erum alla vegan mjög sáttir við að hafa loksins losnað við hana. Höfum reyndar smá áhyggjur af hefndaraðgerðum frá fjölskyldu hennar og eins að hún fari í mál við okkur. Hún hefur reyndar ekki mikið til sins máls vegna þess að hún sagði upp án þess að gefa upp neina ástæðu og það er búið að borga henni allt út. Við reyndar drógum ekki af henni allt sem hún skuldaði okkur, enda höfum við smá áhyggjur af henni, þar sem hún er eina fyrirvinnan á sínu heimili og það verður erfitt fyrir þau eftir að Gulltönn hefur engar tekjur lengur. Hún er reyndar klár og fær trúlega vinnu fljótt annars staðar.