Hvernig á losna við leiðinda starfsfólk!

Já, ókei, ég er bara 47, en hver er svosem að telja. Mér finnst ég vera 94, enda finnst manni maður hafa verið hérna heila ævi. Hér er allt búið að vera á haus. Klikkað að gera, bæði á hótelinu og á ressanum. Gersamlega fullbókað og hvert metið slegið á fætur öðru í fjölda gesta á ressanum. Fullbókað meira að segja í hádeginu og fram eftir degi, þannig að þjónarnir hafa varla getað dúkað borðin fyrir kvöldmatinn. Svo hefur verið þéttsetið í galleríinu í drykkjum, spila, lesa og njóta þess að sitja fyrir framan arininn. Hér hefur verið kynnt upp í öllum arinum frá morgni til kvölds enda verið rigning og frekar svalt.

Tók annað kast á Wany. Lovísa sagði honum að hún hefði verið í vandræðum með að starta jeppanum. Hann spurði hana hvort að miðstöðin hefði verið á, sem hún og var. Þá sagði hann henni að þetta væri búið að vera svona í 3 mánuði að bíllinn neitar að starta ef miðstöðin væri á. Hún sagði Wany að segja mér þetta. Svo leið og beið og aldrei kom hann að segja mér þetta. Þegar hann var að fara með staffið heim, spurði ég hann hvort hann þyrfti ekki að segja mér eitthvað. Ha, hvað? Að bíllinn startaði ekki með miðstöðina í gangi, ég hefði aldrei tekið eftir því og af hverju í ósköpunum vartu ekki búinn að segja mér þetta. Við vorum að tala um þetta um daginn að þú myndir láta mig vita ef eitthvað væri að bílnum. Já, nei, er ekki alveg viss og ætla mér að testa þetta betur. Hvers vegna varstu þá að segja Lovísu þessa vitleysu? Það var fátt um svör. Hann alla vegna kom daginn eftir með veikinda vottorð og þarf að vera í burtu í 5 daga vegna stress einkenna (“burnt out”). Hann var víst búinn að segja einhverju af staffinu að hann væri hættur. Farið hefur fé betra og vona að hann komi ekki aftur. Þarna er víst komin aðferðin til að losna við staff sem ekki er hægt að reka. Taka þau á taugunum þangað til þau fara yfirum. Æji, það er ljótt að segja þetta, en ég er víst sekur um að hafa losað okkur við slæm eppli með reiði köstunum mínum. Vildi að ég hefði notað þessa aðferð á Gulltönn.......

Staffið er búið að vera frekar leiðinlegt alla helgina. Loana hálflasinn og það tók hana heila eilífð í gær að gera hamborgara fyrir okkur, sem komu út kaldir. Veit ekki hvað gengur af henni. Bói átti alvarlegt samtal við hana um skapið hennar og vinnubrögðin og það var nóg til þess að hún henti mér útúr eldhúsinu í gærkvöldi og sagðist ekki þurfa neina aðstoða og að hún myndi kalla á mig ef hún þyrfti á mér að halda. Ég kom á vaktina í seinna fallinu og Lovísa og Bói voru búin að borða. Fengu víst ógeðslegt pasta frá henni sem var skilað inn í eldhús aftur. Ég fékk mjög góðan pasta rétt frá henni þannig að ég hafði ekki undan neinu að kvarta. Ég er búinn að vera annars meira og minna inni í eldhúsi og ekki verið vanþörf á. Karen og Penny voru að hugsa um að labba út vegna þess að Loana hafði ekki undirbúið nægilega vel fyrir þær og Anne hafði verið ókurteis.

Svo er Charlene í eldhúsinu búinn að vera með halelúja kjaftæði og verið að hræða staffið með því að segja að það væru ljótir púkar hérna sem sköpuðu slæmt andrúmloft og það væri bölvun á hótelinu og svo væri andskotinn á vegunum um kvöldið og allir ættu að fara varlega. Djísus, þau er svo trúuð að þau trúa svona vitleysu og verða öll skíthrædd. Það get ég sagt að það er ekki einn einasti púki hérna eða draugur eða neitt slæmt. Ég er mjög næmur á það og hef oft verið hérna einn í myrkri og aldrei fundið neitt nema góða anda hérna. Það er búinn að vera svona leiðindamórall í gangi sem Bói er búin að vera að drepa í fæðingu hér og þar. Hann er ansi góður í að tala þau til.

Lovísa og Gabríel fóru til Cape Town í morgun í Tívólí. Hvorugur okkar hafði orku eða yfirleitt bara tækifæri til að fara með henni. Hún hringdi áðan og var komin í tívolíið sem verður ábyggilega mjög gaman fyrir Gabríel. Þau ætla að gista eina nótt þar og nota svo morgundaginn til að fara á markaðinn og versla smá.

Hér eru flestir búnir að tékka út og það eru ekki mörg herbergi að koma inn. Reiknum samt með því að það verði slatti að gera á ressanum í kvöld, enda 1 maí. Er að hugsa um að fara í kröfugöngu og heimta meiri vín, betri mat og einn frídag á ári.